Soneto Erotico #65 • Peter Solis Nery
Page Hits 257,502

 





Isa ka gab-i, sa baybayon sang bilog nga bulan,
Ginpahipos sang baba mo ang baba ko,
Gin-angkon sang imo mga kamot ang pagkatawo ko.
Kag tungod nga ginahigugma ko ikaw,

Nagpati ako nga ginahigugma mo man ako.
Ginpangita sang dila ko ang dila mo,
Kag ginpangita pa gid niya ang iban pa
Nga mga dila sa imo pusod, pus-on, kag kinatawo.

Daw baroto ako sang kalipay nga nagpaanod-
Anod sa dagat sang kailigbon. Kag sang nagkanay na
Ang dagat, nabilin ako kag ang huganas sang mga balod

Nga nagabalik-balik kasubong handurawan sang gab-i
Nga akon nadamilan ang kaasin sang dagat, sang balas,
Sang balhas, kag sang silak sang bulan sa imo lawas.

 

© Peter Solis Nery, Kakunyag Collection [2005]



«



Leave a Reply